Iesu Dulcis Memoria

This hymn is used on The Feast of the Most Holy Name of Jesus in the Extraordinary Form. Part I is used for Vespers, Part II for Matins, and Part III for Lauds.

Pars I

Iesu, dulcis memoria,
Dans vera cordis gaudia,
Sed super mel et omnia,
Eius dulcis præsentia.

Nil canitur suavius,
Nil auditur iucundius,
Nil cogitatur dulcius,
Quam Iesus Dei Filius.

Iesu, spes pænitentibus,
Quam pius es petentibus!
Quam bonus te quærentibus!
Sed quid invenientibus?

Nec lingua valet dicere,
Nec littera exprimere:
Expertus potest credere,
Quid sit Iesum diligere.

Sis, Iesu, nostrum gaudium,
Qui es futurus præmium:
Sit nostra in te gloria,
Per cuncta semper sæcula. [Amen.]

Pars II

Iesu, Rex admirabilis
Et triumphator nobilis,
Dulcedo ineffabilis,
Totus desiderabilis.

Quando cor nostrum visitas,
Tunc lucet ei veritas,
Mundi vilescit vanitas,
Et intus fervet caritas.

Iesu, dulcedo cordium,
Fons vivus, lumen mentium,
Excedens omne gaudium
Et omne desiderium.

Iesum omnes agnoscite,
Amorem eius poscite;
Iesum ardenter quærite,
Quærendo inardescite.

Te nostra, Iesu, vox sonet,
Nostri te mores exprimant;
Te corda nostra diligant
Et nunc, et in perpetuum. [Amen.]

Pars III

Iesu, decus angelicum,
In aure dulce canticum,
In ore mel mirificum,
In corde nectar cælicum.

Qui te gustant, esuriunt,
Qui bibunt, adhuc sitiunt;
Desiderare nesciunt,
Nisi Iesum, quem diligunt.

O Iesu mi dulcissime,
Spes suspirantis animæ!
Te quærunt piæ lacrimæ,
Te clamor mentis intimæ.

Mane nobiscum, Domine,
Et nos illustra lumine;
Pulsa mentis caligine,
Mundum reple dulcedine.

Iesu, flos Matris Virginis,
Amor nostræ dulcedinis,
Tibi laus, honor nominis,
Regnum beatitudinis. [Amen.]

Words: St. Bernard of Clairvaux, 12th C.
Tune:Iesu Dulcis Memoria” Plainchant, traditional.
Meter: 88.88

Here is a recording of this hymn sung.

This hymn as been translated into English as the following:
Jesu! The Very Thought of Thee
O Jesu! King Most Wonderful!
O Jesu! Thou the Beauty Art

Here is the entire hymn/poem from which these texts were taken:

Iesu dulcis memoria,
Dans vera cordi gaudia:
Sed super mel et omnia
Eius dulcis præsentia.

Nil canitur suavius,
Nil auditur iucundius,
Nil cogitatur dulcius,
Quam Iesus Dei Filius.

Iesus, spes pœnitentibus,
Quam pius es petentibus,
Quam bonus te quærentibus!
Sed quid invenientibus!

Iesu, dulcedo cordium!
Fons veri, lumen mentium,
Excedens omne gaudium,
Et omne desiderium.

Nec ligua valet dicere,
Nec littera exprimere:
Expertus potest credere,
Quid sit Iesum diligere.

Iesum quæram in lectulo,
Clauso cordis cubiculo:
Privatim et in publico
Quæram amore sedulo.

Cum Maria diluculo
Iesum quæram in tumulo,
Clamore cordis querulo,
Mente quæram, non oculo.

Tumbam perfundam fletibus
Locum replens gemitibus:
Iesu provolvar pedibus,
Strictis hærens amplexibus.

Iesu, rex admirabilis,
Et triumphator nobilis;
Dulcedo ineffabilis,
Totus desirabilis.

Mane nobiscum, Domine;
Et nos illustra lumine,
Pulsa mentis caligine,
Mundum replens dulcedine.

Quando cor nostrum visitas;
Tunc lucet ei veritas,
Mundi vilescit vanitas,
Et intus fervet caritas.

Amor Iesu dulcissimus
Et vere suavissimus,
Plus millies gratissimus,
Quam dicere sufficimus.

Hoc probat eius passio,
Hoc sanguinis effusio,
Per quam nobis redemptio
Datur, et Dei visio.

Iesum omnes agnoscite,
Iesum ardenter quærite,
Amorem eius poscite;
Quærendo inardescite.

Sic amantem diligite,
Amoris vicem reddite,
In hunc odorem currite,
Et vota votis reddite.

Iesus, auctor clementiæ,
Totius spes lætitiæ,
Dulcoris fons et gratiæ,
Veræ cordis deliciæ.

Iesu mi bone, sentiam,
Amoris tui copiam,
Da mihi per præsentiam
Tuam videre gloriam.

Cum digne loqui nequeam
De te, tamen ne sileam:
Amor facit ut audeam,
Cum de te solum gaudeam.

Tua, Iesu, dilectio,
Grata mentis reflectio,
Replens sine fastidio,
Dans famen desiderio.

Qui te gustant esuriunt;
Qui bibunt, adhuc sitiunt:
Desiderare nesciunt
Nisi Iesum, quem diligunt.

Quem tuus amor ebriat,
Novit quid Iesus sapiat:
Quam felix est, quem satiat!
Non est ultra quod cupiat.

Iesu, decus angelicum,
In aure dulce canticum;
In ore mel, mirificum,
In corde nectar cælicum.

Desidero te millies,
Mi Iesu; quando venies?
Me lætum quando facies?
Me de te quando saties?

Amor tuuas continuus
Mihi languor assiduus,
Mihi fructus mellifluus
Est et vitæ perpetuus.

Iesu summa benignitas,
Mira cordis iucunditas
Incomprehensa bonitas,
Qua me stringat caritas.

Bonum mihi diligere
Iesum, nil ultra quærere,
Mihi prorsus deficere,
Ut illi queam vivere.

O Iesu mi dulcissimæ,
Spes suspirantis animæ,
Te quærunt piæ lacrimæ,
Te clamor mentis intimæ.

Quocunque loco fuero.
Mecum Iesum desidero;
Quam lætus, cum invenero!
Quam felix, cum tenuero!

Tunc amplexus, tunc oscula,
Quæ vincunt mellis pocula,
Tunc felix Christi copula;
Sed in his parva morula.

Iam quod quæsivi, video:
Quod concupivi, teneo;
Amore Iesu langueo,
Et toto corde ardeo.

Iesus cum sic diligitur,
Hic amor non exstinguitur;
Non tepascit, nec moritur;
Plus crescit, et accenditur.

Hic amor ardet iugiter,
Dulcescit mirabiliter,
Sapit delectabiliter,
Delectat et feliciter.

Hic amor missus cælitus
Hæret mihi medullitus,
Mentem incendit penitus,
Hoc delectatur spiritus.

O beatum incendium,
Et ardens desiderium!
O dulce refrigerium,
Amare Dei Filium!

Iesu, flos matris virginis,
Amor nostræ dulcedinis,
Tibi laus, honor numinis
Regnum beatitudinis.

Veni, veni, rex optime,
Pater immensæ gloriæ,
Affulge menti clarius,
Iam exspectatus sæpius

Iesu, sole serenior,
Et balsamo suavior,
Omni dulcore dulcior,
Cæteris amabilior.

Cuius gustus sic afficit
Cuius odor sic reficit,
In quo mens mea deficit,
Solus amanti sufficit.

Tu mentis delectatio,
Amoris consummatio;
Tu mea gloriatio,
Iesu, mundi salvatio.

Mi delecte, revertere,
Consors paternæ dexteræ;
Hostem vicisti prospere,
Iam cæli regno fruere.

Sequar te quoquo ieris,
Mihi tolli non poteris,
Cum meum cor abstuleris,
Iesu laus nostri generis.

Cæli cives, occurrite,
Portas vestras attollite
Triumphatori dicite,
Ave, Iesu, rex inclyte.

Rex virtutum, rex gloriæ,
Rex insignis victoriæ,
Iesu largitor veniæ,
Honor cælestis patriæ.

Tu fons misericordiæ,
Tu veræ lumen patriæ;
Pelle nubem tristitiæ,
Dans nobis lucem gloriæ.

Te cæli chorus prædicat,
Et tuas laudes replicat;
Iesus orbem lætificat,
Et nos Deo pacificat.

Iesus in pace imperat,
Quæ omnem sensum superat:
Hanc mea mens desiderat,
Et ea frui properat.

Iesus ad Patrem rediit,
Cæleste regnum subiit;
Cor meum a me transiit
Post Iesum simul abiit.

Quem prosequamur laudibus,
Votis, hymnis, et precibus:
Ut nos donet cælestibus,
Secum perfrui sedibus. Amen.

The Paris Breviary uses a section of this text for Lauds on the Feast of the Transfiguration (Aug. 6) which may be found here.

Advertisements

About Noah

musings of a young Catholic aspiring to be faithful to his Lord and God Jesus Christ through His Holy Catholic Church
This entry was posted in Ancient & Mediaeval Hymns, Christmas, Evening Prayer / Vespers, Hymns By The Greats, Latin Hymns, Matins/Office of Readings, Morning Prayer/Lauds, Non-English Hymns, Roman Breviary, Saints of the Church (Canonized or Beatified), St. Bernard of Clairvaux, The Church Year, The Liturgy of Hours/Breviary, The Most Holy Name of Jesus (Jan. 3). Bookmark the permalink.

5 Responses to Iesu Dulcis Memoria

  1. Pingback: O Jesu! Thou The Beauty Art | Saint Augustine's Lyre

  2. Pingback: O Jesu! King Most Wonderful | Saint Augustine's Lyre

  3. Pingback: Jesu! The Very Thought Of Thee | Saint Augustine's Lyre

  4. Pingback: Amor Iesu Dulcissime | Saint Augustine's Lyre

  5. Pingback: Iesu Dulcedo Cordium | Saint Augustine's Lyre

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s