This is the original text of this hymn as it appears in Hymni Sacri et Novi (1689 ed.). It is a hymn for the Feast of St. Clodoald (St. Cloud), Abbot & Confessor (Sept. 7):
Ut Deus nostræ vigilat saluti!
E malis ipsis bona nostra ducit.
Martyres cælo tulit impotentis
Ira Tyranni.
Sanctitas debet tua se furori,
Una spes Franci, Clodoalde, regni.
Si minus duri Patrui fuissent,
Nunc minor esses.
Dum bonis, regno spoliavit hostis,
Fecit heredem patriæ supernæ;
Quid mali fecit? rapuit caduca
Æterna rependit.
Ipse Rex reges numeratus inter
Nunc locum chartæ brevis occupares,
Cælites inter modo qui triumphas,
Addite Divis.
Te Patris numquam diadema cinxit,
Ecce cælestes radii coronant;
Purpuram regum tuus ille vincit
Lucis amictus.
E die quo nunc frueris, vides nos
Nocte sub quanta iaceamus omnes;
Vana quam mundi simulacra rides,
Tutus Olympo.
Huius exemplo, fugiamus altos,
Qui brevi fato fugient, honores;
Quæque sors sæcli male blandientis
Munera spondet.
Summa laus summo super astra Regi,
Regibus qui dat, repetitque regna;
Prona cui soli famulatur omnis
Curia divum.
Words: Fr. Jean-Baptiste de Santeul, 17th C.
Tune: Unknown
Meter: 11.11.11.5